Ua tapunia le faauluina o suafa o sui faatutū mo faiga filifiliga a Vaimauga 3 ma Falealili 1 e ala i palota laiti a ia itumalo palota i le aso 18 o le masina fou o Setema, ma e toasefulu ma le tasi sui ua faaulu ma resitala suafa, e aofia ai le to’afā o sui faatutū mo Vaimauga 3 ae to’afitu mo Falealili 1.
O le to’afā o sui o le a tauvā mo le nofoa o Vaimauga 3, o Nonu Lemauga Laulu William Mauia, Puaalatamai Tupuola Malaeulu Filemoni, Sooialo Lemigaoitamali’i Sooialo, ma Vaiofuaiupolu Chris Faaofo.
O sui faatutū mo le faigafilifiliga a lea itumalo ua toe tauvā ai Puaalatamai Tupuola Malaeulu Filemoni sa tauvā i le palota laititi muamua a Vaimauga 3 na faia i le masina o Me o le tausaga nei.
I Falealili 1 o sui ua faatutū ua mae’a faaulu suafa mo le palota laititi a lea itumalo o Auseugalelei Uiti Lagavale, Fuaolemoli Falaila Faausu Allen, Patea Taveuveu Taamaletoa Aipovi Patea, Seumafaleupolu Aperila Vaa Tiai, Si’a Faaletonu Alec Latu, Taveuveu Willie Tuatagaloa Fetu, ma Tuiloma Tusa Siiliili Laneselota Lameko.
O Tuiloma Laneselota na tauvā i le palota tele ia Aukuso o le tausga ua mavae. O le Aso Faraile o le vaiaso nei e tapunia ai le avanoa mo le toe faauiina i tua o se suafa o se sui tauvā.
