Ua motusia su’esu’ega o molimau i le faamasinoga o le tama’ita’i o Lise Marie Schmidt sa faatulaga mo le vaiaso atoa lenei, ina ua talia e le faamasinoga le talosaga a loia a Lise e suia i le ioe lana tali tete’e i moliaga e iva o lona ave i leoleo o faamatalaga sesē.
O faamatalaga ia o loo faailoa i lana tusi na ave i le Ao o le Malo ma le Komesina o Leoleo, sa ia faailoa ai ni aafiaga o lē sa avea ma palemia le afioga, Fiame Naomi Mataafa, i le maliu o le tinā o Dr Caroline Sinavaiana Gabbard.
I faamaumauga a le itu o leoleo i moliaga ua ioeina e le ua molia, o loo faailoa ai e Lise sa faatonuina o ia e lē sa avea ma Palemia e nanā le telefoni ma le tablet a lē ua maliu, ma sa fai atu foi ia te ia ia mautinoa ia nanā lilo ia meatōtino ia ‘aua ne’i iloa e se isi.
O le isi faamatalaga sesē sa ia ave i leoleo ua ia ioeina e lē moni, e faapea sa ia tatala le telefoni a lē ua maliu ma ia silasila ai i ata ma se video o le taimi na faatino ai le gaioiga i le tinā ua maliu. O le isi faamatalaga sesē ua ioeina e lē ua molia, o lona faapea atu i leoleo sa ia maua foi i le telefoni le leo o se tagata sa vili atu ia Sia ma fai atu pe ua faatino le gaioiga, ae tali iai Sia ua faatino ma ua mae’a.
O loo faailoa ai foi e lē ua molia i leoleo na te faamaonia o le leo o le tagata o loo i le telefoni o le siufofoga o lē sa avea ma palermia. O le isi foi faamatalaga sesē o loo faailoa i moliaga ua ia ioeina, o le faapea atu o Lise i leoleo sa ia mautinoa o le siufofoga lava o Fiame Naomi sa maua i le telefoni i le la talanoaga ma Sia, ona o loo maua foi i le video.
O loo ta’ua foi i se tasi o moliaga a leoleo ua ioe iai Lise lona faailoa i leoleo o le aso 5 o Fepuari o le tausaga na te’a nei 2025 na ave ai lana tusi i lē sa Palemia ma faailoa iai o le a ia logo i leoleo lana faatonuga e nanā lilo le telefoni ma le tablet.
O le ioeina uma ai o moliaga e iva o le ave i leoleo o faamatalaga e lē sa’o ma le faamoemoe e faasesē ai le faatinoina o le latou galuega o lona faasalaga maualuga e lē silia 3 masina i le falepuipui.
O le iva o isi moliaga ua faaui i tua e leoleo o moliaga ia o le faia o se gaioiga i le ave ona tala sese ma le le sa’o, ma tuua’ia ai le sa avea ma palemia, i se taumafaiga e faaleaga ai lona tamaliiaga. Ua totoe ai nei le moliaga e tasi o le taumafai ise gaioiga ua fafau ai ni tuua’iga e le moni, ina ia su’esu’e ma molia ai e leoleo le sa avea ma palemia le afioga Fiame Naomi Mataafa.
O le Aso Lulu le ogatotonu o lenei vaiaso ua valaau ai lea moliaga i le faamasinoga faaitumalo e faatulaga ai le isi laasaga o le a sosoo ai. I moliaga ua faamaonia o le a faamautū mai i se taimi e le faamasinoga se aso e tuuina atu ai tapenaga masani a loia e aofia ai ni folasaga e tapena ai se faaiuga i se faasalaga.
