O le tapenaina o le resitala o pepe ma fanauiti i le atunuu e agava’a i le faamanuiaga tupe mai le malo lea o le a amata ona maua i le tausaga fou 2027, e manaomia ai le maua o faamatalaga sa’o ma moni atoatoa ina ia alu sa’o le faamanuiaga i matua ma e o vaaia fanauiti o loo autū iai lea polokalame fesoasoani a le malo.
O le faafetai a le Minisita o le Matagaluega o Aiga ma Agafesoota’i o loo faamaopoopoina tapenaga o resitala, ona o le afe atu o se Samaria Agalelei ma se fesoasoani tāua o masini e maua ai fesootaiga initaneti le Vodafone Samoa.
Ua faailoa e le Matagaluega o masini routers e iva ma sim-cards mai lea kamupani o le a fa’aaoga e maua ai fesootaiga initaneti mo le faia o le resitala ina ia mautinoa ia lelei atoatoa faamatalaga e maua mo lea galuega.
E 20 miliona tālā ua faatulaga e le malo e totogi atu i le penefiti o pepe ma fanauiti uma e agavaa lea e tusa le aofai ma le 13,000.
O le aso 14 o le masina lenei o Setema e amata ai ona resitala pepe ma fanauiti e agavaa i le maua o le penefiti o le soifua mālōlōina o fanau.
