Ua faailoa e le Minisita o le Soifua Mālōlōina i le auaunaga faasalalau o le Talamua le faia ai nei o se su’esu’ega i le faatau atu faasolitulafono o fagu’ea okesene o ni meatotino a lana Matagaluega i se isi o Auaunaga a le Malo, le Pulega o Tineimū ma Galuega Lavea’ i taimi o ni faalavelave tutupu faafuase’i.
I se finagalo o le Minisita le tōfā Va’aaoao Salumalo Alofipo i lea auala o faasalalauga, o loo ia faailoa ai e to’atolu tagata faigaluega sinia o le Matagaluega ua faamālōlō lē tumau a o faia su’esu’ega, ma ua aofia ai ni Ofisa sili Lagolago se to’alua o le Matagaluega o le Soifua Mālōlōina.
Ua ia faailoa ai foi o le isi lea mafua’aga o le sioki poo le faaitiitia o fagu’ea okesene mo le auaunaga.
O ni vaiaso e le’i mamao atu sa lipotia ai foi le lē taunuu o nisi o ta’otoga o gasegase ona o le faaitiitia o le okesene e maua, o le mafua’aga lea na aumai ai i Amerika Samoa e le va’aleoleo o le Nafanua fagu’ea okesene mo le fa’aauauina o galuega a le Soifua Mālōlōina e manaomia tele ai le okesene.
