Ua faailoa ai nei e le vaega faaupufai o le Faatuatua i le Atua Samoa ua Tasi ana sui faatutū mo palota lāiti a Vaimauga 3 ma Falealili 1 i le Aso 18 o le masina nei o Setema, i le tuanai ona faailoa e le vaega faaupufai e puipuia aiā tatau a tagata ana sui tauva mo ia faiga filifiliga.
O Vaimauga 3 o le a tauva i le fu’a a le Faatuatua i le Atua Samoa ua Tasi le tōfā Puaalatamai Tupuola Malaeulu Filemoni, ma Nonu Lemauga Laulu William Mauia. O sui faatutū o lea patī faaupufai mo Falealili 1 o Auseugalelei Uiti Lagavale, Si’a Faaletonu Alec Leaupepe Latu, Fuaolemoli Falaila Faausu Allen, ma Seumafaleupolu Aperila Vaa Tiai.
O sui faatutū o le vaega e puipuia aiā tatau a tagata o Taveuveu Willie Tuatagaloa Fetu mo le palota laititi a Falealili 1 ae o Vaiofuaiupolu Chris Faaofo mo le palota laititi a Vaimauga 3.
O le Aso Faraile o lenei vaiaso e tapunia ai le toe faauiina i tua o se suafa o sui faatutū e sefulutasi ua mae’a resitala ma faaulu suafa mo ia faigā filifiliga o le a faia i le lua vaiaso o lumanai nei.
