O taaloga a le Olimipeka e faia i Brisbane i Ausetalia i le tausaga e 2032 ua avea ma mafua’aga o le faasoa atu e Ausetalia o se vaegatupe e 15.6 miliona tālā Ausetalia poo se aofaiga e 30 miliona tālā Samoa, e lagolago ai tagata ta’aalo mai le pasefika e aofia ai ma Samoa mo ia taaloga a le lalolagi.
E ui e faatoa talimalo Ausetalia i taaloga a le Olimipeka e aofia ai taaloga Olimipeka mo tagata e iai aafiaga tumau o le soifua le Paralympics pe a mae’a taaloga lava ia e talimalo ai le setete o Kalefonia i Amerika i le tausaga e 2028, ae ua faaalia e le Palemia o lea malo ma le minisita o atunuu o le Pasefika a Ausetalia, o lana fesoasoani tupe o se seleni o le a faafaigaluega e tapena mamao ai tagata ta’aalo o le Pasefika mo le Olimipeka i Brisbane i le 2032.
O le faigā pa’aga a Ausetalia ma atunuu o le pasefika e ala i lea fesoasoani o loo fuafua e ausia ai e tagata ta’aalo o lenei faaitulagi ni tulaga lelei ma maualuga i le manumalo i ni pine auro. O Samoa ma isi atunuu e 13 o le Pasefika o le a agavaa i lea fesoasoani o le a faasoa mai i totonu o le 4 tausaga.
Ua lē gata ina autū le faaaogaina o le 15.6 miliona i le tapenaina o tagata ta’aalo o le Pasefika mo le Olimipeka i Brisbane, ae o le a fesoasoani foi Ausetalia i tapenaga mo taaloga a le Olimipeka i Los Angeles i Amerika, o taaloga a le Pasefika e faia i Tahiti i le tausaga fou, ma ta’aloga laiti a le pasefika poo le Pacific Mini Games e faia i le Atu Kuki i le tausaga e 2029.
