Ua faatulaga nei e le faamasinoga le aso 16 o le masina o Mati o le tausaga fou 2027, e aumai ai sana faai’uga i se faasalaga mo le tama’ita’i o Lise Marie Schmidt lea ua na ioeina i le Aso Lulu le moliaga e tasi o le taumafai e nātia le faia o le amiotonu poo le attempt to defeat the cause of justice.
Ua faaopoopo atu le moliaga e tasi lea i moliaga e iva (9) o le ave i leoleo o faamatalaga sesē lea na ioeina foi e Lise Marie Schmidt i le Aso Lua o le vaiaso nei a o faasolo le su’esu’eina o molimau e 36 a leoleo.
O le valaauina o le moliaga o le taumafai e nātia le faia o le amiotonu i le Aso Lulu na faailoa ai e loia o loo tulai mo lē ua molia ua ave i tua le tete’e a Lise i le moliaga ae suia lana tali i le ioe.
O se moliaga o loo faamatalaina i faamaumauga a le faamasinoga sa taumafai ai lē ua molia e ave tuua’iga sesē i leoleo i se gaioiga e o’o ai ni tulaga faigata i lē sa avea ma Palemia ma su’esu’eina ai e leoleo.
(attempt to defeat the cause of justice by making false allegations/ complaint to police which place Fiame Naomi Mataafa at risk of being investigated and/ or prosecuted by police)
I le mae’a ai o taualumaga o su’esu’ega a le faamasinoga i lea mataupu ua manino mai ai e sefulu moliaga poo solitulafono ua ioeina e Lise, e mafua i lana tusi na ia faailoa ai tuua’iga o le aafia o lē sa avea ma palemia i le maliu o le tinā o Dr Caroline Sinavaiana Gabbard. Ua fa’aauau ona tatala le ua molia i tu’utu’uga a le faamasinoga, ma ua toe faamanatu iai e le tama’ita’i faamasino o loo tau’aveina lea tagi a leoleo le afioga Alalatoa Rosella Papali’i, e tumau lava le tapu poo le sā o loo taofia ai ona faia ni faasalalauga a lē ua molia i luga o upega tafā’ilagi, a o tālia ai le lauina o se faaiuga i se faasalaga o moliaga ua ia ioeina.
Fa’aalia e Lise i fafo o le potu faamasino ina ua maea taualumaga a le faamasinoga i le aoauli o le Aso Lulu, ua maua lona to’a.
E 19 moliaga a leoleo sa muamua te’ena e Lise, ae ua faaui i tua le iva ae suia le tete’e i le ioeina o moliaga e sefulu.
O loo aiaia i le tulafono o soligatulafono le faasalaga e 3 tausaga i le falepuipui pe a faamaonia le moliaga o le taumafai e nātia le faia o le amiotonu.
