Ua lē mafai ona auai le Sā e tasi mai Salafai le Tolotolo o Tamauli i le tū’uga o le vaiaso o polokalame o le Measina, ma ua totoe ai na o le lima fautasi o le a sa’ili ai le siamupini.
Ua faailoa lea suiga e le Komiti o loo faamaopoopoina le polokalame o le vaiaso o le measina ina ua mae’a le se’igā pepa mo le faatulagaina o Sā o le tū’uga lea ua faatulaga mo le Aso Tofi o le vaiaso fou.
E lua Sā mai Manono, lua mai le afio’aga o Toamua ma le fautasi o le afio’aga o Apia o le a auai i le tū’uga.
O faailoga e le’i faailoaina i le taimi nei, e faapena foi i faailoga o isi tauvaga.
I nisi o fuafuaga o le Aso Faraile lenei i Samoa o le a faalauiloa aloa’ia ai tama’ita’i e to’avalu o le a tauvā i le sa’iliga o se Tausala o Samoa.
O Kilikiti faasamoa ua faatulaga nei o le Aso Gafua a sau e faia ai taaloga o quarter finals, Aso Lulu a sau o semi finals ae sa’ili ai le siamupini i le vaega o alii ma tama’ita’i i le Aso Tofi a sau a o lumana’i le Aso Faraile e tufatufa ai faailoga o lea taamilosaga faapea isi tauvaga uma o le vaiaso o Measina.
