Ua aumai faalauaitele e le Matagaluega o Leoleo, Falepuipui ma le Toefuata’ina se talosaga i le atunuu, e tuuina atu ni faamatalaga poo ni ata video e fesoasoani i suesuega o le mafua’aga o le maliu o Mateo Kofe 44 tausaga o lona soifua.
O loo tuua’ia se gaioiga o le faao’olima na faia e leoleo i lē ua maliu, a o su’eina e se vaega o malu o le malo le fale o Mateo i le fa’aiuga o le vaiaso na te’a nei i le sā’ilia o nakoti poo fualaau faasāina.
O le talosaga a leoleo mo ni mau e lē gata o ni ata video, o ata pu’e aemaise o ni mau i se gaioiga tau faao’olima ma le fa’aaoga o se malosi e leoleo i le ua fano le soifua.
Ua faailoa e le Matagaluega o ia mau uma pe afai e tuuina atu o le a fa’aaoga i ia latou su’esu’ega. O se lipoti i le faaiuga o le vaiaso o loo faailoa ai na valaau e leoleo le taavale ave ma’i, le ambulance na oo atu i le nofoaga i Sinamoga na faatino ai le osofa’iga tau fualaau faasāina a leoleo, ma ave lē ua maliu i le maota gasegase.
O loo tē’ena ai foi e le Sui Komesina i le lipoti a le Samoa Global le a’afia o se gaioiga faao’olima na faia e leoleo i lē ua maliu, peita’i o le Aso Sa i le upega tafāilagi a le Matagaluega o Leoleo, Falepuipui ma le Toefuata’ina na faasalalau ai e leoleo le manaomia o le fesoasoani a le atunuu ia latou su’esu’ega i le mafua’aga o le maliu o Mateo Kofe o Sinamoga, o se tagata na taofia muamua e leoleo ia Tesema o le tausaga na tea nei i se isi o a latou osofa’iga tau fualaau faasaina.
