Ua amata ona su’esu’e molimau e 36 a leoleo o loo lagolago ai moliaga e 19, o loo tuuaia ai Lise Marie Schmidt i lona faia o ni tala tau faaleaga e ala i se tusi na ia faia ma tuuina atu i le Ao o le Malo ma le Komesina o Leoleo.
O lea tusi sa ia faailoa ai ni tuua’iga i le aafia o lē sa avea ma palemia le afioga, Fiame Naomi Mataafa i le maliu fasia o Dr Caroline Sinavaiana Gabbard. O le 36 o molimau a leoleo o loo aofia ai ma le afioga, Fiame Naomi Mataafa.
O uluai molimau na valaauina i le amataga o su’esu’ega a le faamasinoga i le Aso Gafua o lenei vaiaso, o se tama o loo vaaia le pisinisi turisi i le afioaga o Vavau, ma se ali’i talavou sa galue ai i le pisinisi i le tausaga e 2024. O i la’ua ia sa o la faamatala o la molimau i le Aso Faraile 24 o Me o le tausaga 2024 na oo atu ai le tama’ita’i o Papali’i Sia Figiel e fia tofa ma malolo i le matafaga i Vavau o loo faagaioia ai le pisinisi.
O lē tasi o molimau na amata ai su’esu’ega a le faamasinoga o se tinā e tausoga ma Papali’i Sia Figiel ua maliu ae nonofo faatasi i se fanua o lo latou aiga i Vaivase Tai. O le vaiaso atoa lenei o loo su’esu’eina ai molimau ma o se tama’ita’i loia mai fafo o loo tula’i mo lē ua molia, ae o le tama’ita’i loia le afioga, Magele Leone Mailo Su’a o loo finauina moliaga a leoleo.
O nisi o molimau, o ali’i leoleo sa galulue i le va’aia o le puipuiga o le saogalemū o le afioga Fiame Naomi Mataafa a o avea ma palemia o le atunuu.
O Me o le tausaga e 2024 na tula’i mai ai se gaioiga solitulafono i le fale o Papali’i Sia Figiel i Vaivase tai na maliu ai Dr Caroline Sinavaiana Gabbard, ma e maliu Papali’i ia Ianuari o le tausaga nei o loo nofo taofia i le falepuipui i Tanumalala ua mae’a ona su’esu’eina moliaga sa tuua’ia ai, ma ua faatali le lauina o le faaiuga a le faamasinoga i moliaga o le faao’o o le maliu ia Dr Caroline.
