O le tapenaina o fa’ailoga mo vaega lautogia o le tausinioga e sa’ili ai se tama’ita’i e avea ma tausala o Samoa, e tele tapenaga āua o le tasi lea o vaega e tāua tele, ona e tauia ai le tautiga o tama’ita’i ma e uma o lagolagoina.
I le sa’ilia o se tausala o Samoa i le faaiuga o lenei vaiaso lea e taualuga iai polokalame o le vaiaso o le fa’aaliga o Measina a Samoa, ua iai se fa’ailoga o se taavale o le a maua e le tama’ita’i o le a sola ma le manumalo o le pale o le tausala o le atunuu.
O le kamupani faatau taavale o le Rana Auto Selection ua na faailoa lautele i le nusipepa o le Samoa Observer, lona ofoina o lea fa’ailoga mo le tama’ita’i o le a avea ma tausala o Samoa. Fa’aalia e le pulega o lea pisinisi o lana faafetai lea ia Samoa i le lagolago atu; aemaise o le matagofie o ana tū ma aganuu ma uiga tausa’afia o a tatou tagata ua latou molimauina ae e le’i leva ona ulufale mai i lo tatou atunuu ma faagaioia ai lana auaunaga.
O le tausala o Samoa ua lamalama faaiu lana nofoaiga le tama’ita’i o Feagaimaalii Soti Mapu na ia taua’aoina le taavale o le a avea ma fa’ailoga autu mo le tama’ita’i tauvā o le a manumalo i le po o le Aso Toonai nei.
