E ui e le’i tausisia e le Kalapu Lakapi a le afioaga o Moataa le tolu masina e tuuina atu ai le talosaga i le malo mo se fesoasoani tupe mo lana taamilosaga lakapi ta’ito’afitu o le fa’aaliga o Measina a Samoa i le faaiuga o le vaiaso nei, ae na faailoa e le Minisita Lagolago o le Matagaluega o Taaloga ma Alagaoa mo le fiafia o tagata i le fa’alauiloina o lea taamilosaga lakapi fitu, sa faia lava le faaiuga a le Kapeneta e tuuina atu se fesoasoani.
O le taamilosaga lakapi fitu i Satoalepai i Savaii, i le faaiuga o le vaiaso ua mavae, e $20,000 tālā na faameaalofa iai e le malo.
Se vaega o le saunoaga a le Minisita Lagolago o Taaloga ma Alagaoa mo le fiafia o tagata le tofa Fiu Ponifasio Vasa i le sauniga na faalauiloa ai le taamilosaga lakapi fitu a Moataa mo le vaiaso o le Measina Festival.
E 16 ‘au a ali’i o le a tausinio mo le sa’ilia o le siamupini o le vaiaso o le Measina, ae o loo iai foi ma ‘au i le vaega e i lalo o le 15 ma le 18 tausaga le matutua.
O loo iai foi ma ‘au lakapi ta’ito’afitu i le vaega o tama’ita’i. O le Aso Faraile ma le Aso Toonai o lenei vaiaso e faagasolo ai lea taamilosaga lakapi.
O le lagolago autū o le taamilosaga a le kalapu lakapi a Moataa i lenei tausaga o le afioga i le al’ii Pule Faatonu le afioga Masoe Charlie Vaai ma le kamupani o loo gaosia le ‘ava malosi poo le beer o le Vailima.
