O le faaolaolaina pea o pese, o fatuga faasamoa o tausaga ua alu, ma faatāua ai le faatumau o ia fatuga ma le fa’aaogaina o upu o le tatou gagana e momoli mai ai se feau ma se tala i se mea na tupu, o le autū lea o le toe aoao mai o ia pese a le atunuu ma faatulaga lona usuina io latou fati sa’o na usu ai lea o loo tuufaatasia nei e le susuga i jle faafeagaiga i a Letupu Matautia ma le aufaipese a le Ekalesia Faapotopotoga Kerisiano o le Loimata o Apa’ula i Papauta.
O le fuafuaga o le masii atu i Aotearoa o le faifeau ma le aufaipese e faalauiloa ai ia pese o fatuga tuai faasamoa ma avanoa a tupulaga o le atunuu sa soifua ma ola a’e i Niu Sila e toe faafofoga i ia pese a Samoa aemaise o le toatele oo tatou tagata o loo alala ‘aitau malele i fafo.
O le tasi o vaega tāua o lea faamoemoe e ala i se koneseti e faia i Aukilani i le aso 18 o le masina o Tesema o le tausaga nei, o le manatua ai o fatupese sa latou tūsia ma fatu ia pese faaleaganu’u. O nisi o fatu pese o Tusanilefaiaao Faaolofala Reti Simanu, Pu’auea Fai’ivae Tuiletufuga Hunkin, Rev Oka Fauolo, Maiavatele Pouono Hunkin, Rev Sotiaka Enari Snr, Malifa Lemalu Faletoese, Umaga Pa’u, le auuso tama le afioga I’iga Toleafoa Talitimu Sio, Rev Ariu Sio, ma Gatoloai Peseta Siaosi Sio.
Ua fa’aalia i se pepa o faalauiloa mai le Ekalesia, EFKS o Loimata o Apa’ula, ua faia ni fesoota’iga ma alo ma fanau faapea aiga o ia tamali’i ma faifeau fatupese mo le fa’aaogaina o latou fatuga i le tapenaga o loo faagasolo.
O le nofoaga o le Te Paepae Theatre New Zealand International Convention Center i le aai o Aukilani o le a faia ai lea koneseti ia Tesema.
O le masi’i atu foi o le aufaipese a le EFKS o Loimata o Apa’ula o le a pepese ai i le faaaliga o pesepesega o le 13 aso o le Kerisimasi i Aukilani lava i le masina faaiu o lenei tausaga.
