Ua tuana’i ona faailoa lautele ai e le malo lona lē toe aloa’ia o le pulega o le taaloga lakapi i le atunuu o loo faagaioia e le Lakapi Samoa, ae ua faailoa ai nei e le malo lona aloa’ia o le iuni lakapi fou a Samoa lea ua faaigoaina o le Samoa Football Rugby Union.
Ua faailoa lautele e le malo lea faaiuga a o tālia ai le tapenaga a le pulega o le lakapi i le lalolagi o loo fautuaina ai le faia o se iloiloga poo se review i le lotoifale o le pulega o le Lakapi Samoa. E le’i manuia sā’iliga i se finagalo o le ta’ita’ifono o le komiti faafoe o le lakapi Samoa e tusa o le faaiuga ua taunuu iai le malo, ae o le pepa o faamatalaga mai le Ofisa Sooupu o le malo o loo faailoa ai, o loo tapena e le Matagaluega o Taaloga ma Alagaoa mo le Soifua Fiafia o tagata le maliega e faamautū ai le lagolago a le malo i le iuni lakapi fou lea o le a feagai ma le toe atina’eina o le taaloga lakapi i Samoa.
Fa’aalia e se molimau o loo tālia e le pulega o le taaloga lenei i le lalolagi se finagalo o le malo i le fuafuaga e faia se iloiloga i le lotoifale o le lakapi samoa o loo iai le pulea o le taaloga i lo tatou atunuu, e pei ona faase’e tuāgalu ai sui o le komiti faafoe ae filifilia e le lakapi a le lalolagi nisi latou te fa’aauau polokalame masani o le taaloga e tālia ai se taunuuga o lea iloiloga poo le review.
