I le to’aselau o leoleo mai atunuu o le Pasefika o loo faia le galuega o le puipuiga o le saogalemu o usugafono uma o loo auai i le fono lona 55 a Ta’ita’i o Malo o le Pasefika o loo usuia nei i le atunuu o Palau, ua aofia ai ma le to’afā o malu o le malo mai Samoa, lea e toatolu alii ma se tamaitai e to’atasi.
Ua faailoa i se Pepa o Faamatalaga o se vaega toatele lea o leoleo o le Pasefika ua galulue i le va’aia o le puipuiga o lea fonotaga faavaomalo mo atunuu o le pasefika, ma o leoleo ia mai le auaunaga ua ta’ua o le Pacific Police Support Group. Sa maua le avanoa o le tama’ita’i sui palemia le afioga, Mulipola Anarosa Ale Molioo o loo ta’ita’ia le usugafono a Samoa i lea fonotaga e feiloai atu ai i ia malu o malo ma momoli iai le faafetai i le faatinoina o a latou tiute o le puipuiga mo le saogalemu o le fono a Ta’ita’i o Malo o le Pasefika.
O le taligāmalo a Samoa i le Fono a Ta’ita’i o Malo o Taupulega, sa malaga mai ai foi sui o auaunaga faaleoleo ma nisi o atunuu o le pasefika e pei o Fiti e fesoasoani i le puipuiga o le saogalemu o usugafono i lea faatasiga tele faavaomalo e 50 ma ona tupu atunuu sa auai.
O le iai o leoleo mai Samoa i le galuega o le puipuiga o le fono a Ta’ita’i o le Pasefika i le atunuu o Palau, ua fa’aalia o se isi lea o faailoga o le amanaia o le maualuga o le tulaga ua iai le faatinoga o ia tiute e malu o le malo i Samoa. O le ogatotonu o lenei vaiaso e mae’a ai lea fonotaga.
