Ua faagasolo i lenei vaiaso galuega a le faamasinoga o talosaga a le Faamasinoga Maualuga ua iloilo ai nisi o faaiuga a lea faamasinoga ua toe apili.
O nisi o ia faaiuga e faasino ini mataupu tau faamasinoga o soligatulafono e pei o le mataupu i le va o leoleo ma Mase Mahonri Schwalger, va o leoleo ma Petaia Setu ma le taloasaga a le sui faipule o Faleata 3 o loo autū i le toe iloiloina o le faaiuga a le tama’ita’i loia sa finauina moliaga a leoleo sa molia ai le Palemia, ma isi e to’alima lea sa su’esu’eina i le Faamasinoga Faaitumalo lea na aumai le faaiuga i le masina o Mati o le tausaga nei.
O faamasino mai fafo o loo su’esu’eina ia talosaga apili ma le faamoemoe e aumai faaiuga pe a mae’a ona su’esu’eina ia mataupu e le Faamasinoga o Talosaga.
O le tauaofiaga faai’u lea o lenei tausaga a lea faamasinoga e pei ona faalua ona tauaofia i le tausaga.
