Ua faatumauina le faai’uga a le Faamasinoga Maualuga na faamaonia le moliaga o le fasioti tagata faamoemoeina ma moliaga i solitulafono tau le umia o au’upega o la’au malosi o Semisi Ali’imatafitafi, ina ua taunuu iloiloga a le Faamasinoga o Talosaga toe iloilo i le tē’ena o le apili a Semisi sa finauina e lana loia.
Sa finauina i le apili le mau a Semisi ma lana loia e le’i silasila su’esu’ega a le faamasinoga maualuga i mau ‘ānoa a leē ua molia sa tu’uina atu i le su’esu’ega, ma le isi mau sa finauina e le loia a Semisi, e sesē le faai’uga a le faamasino i le faamaonia o le moliaga fasioti tagata faamoemoeina ae sa tatau ona faamaonia i le solitulafono o le fasioti tagata pa’ivalea.
O le silasila a le Faamasinoga o Talosaga Toe Iloilo e sa’o le faaiuga a le faamasinoga ona o le umia e lē ua molia o se fana laititi ma faapā ae alu atu ai le pulu ma aafia ai le fatafata o lē ua maliu, o se mau manino e iloa ai sa iai le faamoemoe o lē na umia le la’au malosi e faao’o le maliu i le isi tagata.
Comments
Loading comments…