Ua faitau aso nei ona oo atu lea i le Aso Lulu ma le Aso Faraile o lenei vaiaso e faatino ai palota lāiti a Vaimauga 3 ma Falealili 1 e toe filifili ai ni sui usufono i le palemene o ia itumalo faa-le-palota. O le faaiuga o le vaiaso ua mavae na mae’a ai a’oa’oga mo tagata faipalota e aofia ai ma le vasega o malu o le malo sa faatautaia e le Ofisa o le Komisi o Faiga Palota.

Ua faailoa foi e lea ofisa e nafa ma tapenaga o faiga palota a le atunu’u e filifilia ai tofi faipule o itumalo i le Palemene, fale palota mo faigā filifiliga a tagata palota o Vaimauga 3 ma Falealili 1.

Advertisement

Ua tapunia foi le resitala o sui faatutū ma ua muta foi le avanoa e toe faaui ai i tua se suafa o se sui tauva ua faatumau lava le numera e toafitu sui tauva mo le palota laititi a Falealili 1 ae to’afā sui faatutū mo le filifiliga a Vaimauga 3.

O le Aso To’ona’i talu ai na molimauina i fa’asalalauga i le upega tafā’ilagi a le Vaega Fa’aupufai o le Fa’atuatua i le Atua Samoa ua Tasi le latou fa’alauiloa sa afea ai ia itumalo palota, a o lumana’i le Aso Lulu nei o le palota muamua po’o le pre-polling ma le Aso Fara’ile 18 o Setema e faia ai palota laiti.

Ua tapunia ai foi ma faatōsina e lē tatau ai ona toe va’aia ni fa’alauiloa a sui tauvā ma pātī faaupufai i auala o feso’otaiga masani ma luga o upega tafā’ilagi.

O le vaega e Puipuia Aiā Tatau a Tagata ma le Faatuatua i le Atua Samoa ua Tasi o loo tauvā o latou sui faatutū i ia faigā filifiliga e faia i le vaiaso nei.