O le lagalaga o le A’oga o le Amosā o Sāvavau o loo i le nofoaga o Maugatui i Vaitele, ma le Sosaiete o le Aiga Folau o Samoa, faaopoopo iai ma le lagolago a le Malo o Farani i le faatupeina ua mafai ai nei ona toe silasila tupulaga o nei aso i foliga o le va’a soātau o fausaga anamua e iai lona la e folau ai.

O le Aso Faraile ua mavae na umusa ma fufui ai le va’a soātau ua faaigoaina e le Pule Faatonu o le A’oga o le Amosā o Sāvavau, le afioga i le Papa Le Tagaloa Dr Pitapola o le Ve’ave’alagisatiuimoana. O le afioga Aiono Dr Fanaafi Le Tagaloa o sē tasi o sui faavae ma faatonu o le a’oga o le Amosā o Sāvavau, na amatamea i le galuega o le vaa soātau lea sa ia totōina le la’au o le talie na faalalo ma ta ai le va’a soātau i le aulia ai o le 29 tausaga talu ona ola le talie, ma ua matua lelei mo le tāina o le va’a soātau nofoa fā.

Advertisement

Sa maua le avanoa i sē tasi o alo tama’ita’i o le afioga Aiono, le afioga To’oto’ole’a’ava Fanaafi Le Tagaloa na te faamatalatala ai le autū o le galuega ua mae’a.

Se faatalanoaga ma le afioga To’oto’ole’a’ava Fanaafi Le Tagaloa o se sui o le a’oga o le Amosa o Savavau na amataina le poloketi o le tāina o le vaa soātau ua faaigoaina o le Ve’ave’alagisatiuimoana.

Ua selau tausaga ae faato’ā toe silasila lea o le atunuu ise va’a soātau o fausaga anamua e fa’aaoga le la e folau ai.