Aso Lua 09 Setema, 2026.
Ua faagasolo i lenei vaiaso a’oa’oga mo faia’oga ma laufalī faapea faamasino o fusuaga mai atunuu o le Pasefika o le a tausinio i le faaiuga o le vaiaso i le ta’amilosaga o faipelega a atunuu o le Oceania ua talimalo ai Samoa i lenei masina.
O se ta’amilosaga tāua mo Samoa ona o le tausaga fou e faia mai ai i lo tatou atunuu le ta’amilosaga o faipelega e sa’ili avanoa mo taaloga a le Olimipeka lea e sa’ili ai tama fusu e agavaa i taaloga a le Olimipeka i le tausaga e 2028 e faia i Los Angeles i Amerika.
E tāua foi mo Samoa le ta’amilosaga fusu a le Oceania ona e tapena ai tama fusu a lo tatou atunuu mo taaloga a le Pasefika i le tausaga fou 2027.
O le faaiuga o le vaiaso na te’a nei sa faia ai se ‘ava o le feiloaiga sa faafeiloai ai au fusu mai atunuu ‘ese’ese e pei ona lipotia e 13 ‘aufusu o loo auai mai mo lea ta’amilosaga. O le Aso Tofi nei e tatala aloa’ia ai lea ta’amilosaga o le taaloga o faipelega i le faletaalo o le Multipurpose Gym i Tuanaimato ona faagasolo ai lea i le faletaalo numera tasi le Gym 1 i le faamoemoe e mae’a i le Aso Toonai.
