Ua faalauaitele mai i le Aso Lulu o lenei vaiaso se Pepa o Faamatalaga Faalauaitele mai le Ofisa Sooupu o le Malo ua faailoa ai se faaiuga a le Kapeneta i le faamuta ai pe terminate le tautua a se tamali’i sa umia se tulaga sinia i le Pulega o Fela’ua’iga i luga o le Lau’ele’ele le Land Transport Authority le susuga Vaiofuaiupolu Chris Faaofo.
O le taunuuga lea o se iloiloga faalotoifale sa faia e le Komiti Faafoe o lea pulega a le malo e pei ona faailoa i le Pepa o Faamatalaga, ma ua tuuina atu ai le mataupu i le Matagaluega o Leoleo, Falepuipui ma le Toefuataina mo se su’esu’ega e tusa o ala faaletulafono.
O le tagata faigaluega ua faamālōlō o loo sauni e tauvā i le nofoa o Vaimauga 3 i le palota laititi e faia i le Aso Faraile o le vaiaso fou.
O le faalauiloa o le faaiuga a le Kapeneta ua fete’ena’i ma le tusi a le Loia Sili a le Malo o le aso 6 o Iulai, na tusi tali ai i le Ofisa Sili o Pulega o Fela’ua’iga i luga o le Lau’ele’ele. O loo faailoa e le Loia Sili le afioga, Mauga Precious Chang i lana tusi, ua ia taua’aoina le fautuaga mai le Matagaluega o Leoleo ua faailoa atu ai, ua lē mafai e leoleo ona maua ni mau e lagolago ai le faia o ni moliaga solitulafono faasaga ia Chris Faaofo.
O lea tusi a le Loia Sili na avea ma molimau malosi i le filifiliga a le vaega faaupufai e Puipuia Aiā tatau a tagata e tauvā le afioga Vaiofuaiupolu Chris Faaofo i le fu’a a le pati faaupufai mo le nofoa o Vaimauga 3.
O le faaiuga a le Kapeneta ua faailoa ma le tusi a le Loia Sili ua aumai ai se finagalo o lea patī faaupufai i lana upega tafā’ilagi ua fautuaina ai le atunuu aemaise le itumalo o Vaimauga 3 ina ia to’a pea le tai.
