O le vaiaso nei o loo taamilo i le motu o Savai’i le Palemia ma Minisita o le Kapeneta mo le asiasia o galuega ma atina’e a le Malo o loo faatino ai, ma o se avanoa foi lea o le fono ai mo le taimi lona lua le Kapeneta i le motu tele i Salafai.

O le maota o le Faalapotopotoga o le Faaputugatupe o le Lumanai Manuia o tagata i Salelologa o le a fono ai le Palemia ma ana Minisita, ma o le nofoaga foi lea na usuia ai le ulua’i fono a le Kapeneta i le masina o Setema o le tausaga e 2022 a o avea le Sui faipule tama’ita’i o le itumalo palota o Lotofaga ma Palemia le afioga Fiame Naomi Mataafa.

Advertisement

Ae i le asia ai e le Palemia le susuga Laaulialemalietoa Leuatea Polataivao Fosi ma lana Kapeneta o galuega ma atina’e i Savai’i o se avanoa tāua lea sa ia faailoa i lana saunoaga i le sauniga o le suaina o le ‘ele’ele mo le fausia o le falema’i fou i le taulaga i Salelologa, o le a feiloai atu ai i fa’auluuluga o konekarate ma pisinisi tuma’oti o loo faia le tautua i le malo i lea vaega o le atunu’u.