O taumafaiga ua faatino nei e le Malo, o Ekalesia, Pulega mamalu a Alii ma Faipule ma le lautele o le atunuu e tineia ma taofia le fa’aaoga o fuala’au faasāina, o loo fetaia’i pea ma lu’itau ona o loo maua pea i osofaiga a leoleo nofoaga o loo faafailele ai lea solitulafono.

O le fā masina talu ai i se galuega a leoleo i Faleasi’u na maua ai se faato’aga o le la’au faasāina o le maruana lea e 177 laau na maua ai. E vaavaalua lava le totō o la’au faasāina ma le umia o au’upega o la’au malosi ma ututau.

Advertisement

Na molia ai se tamā ua faitoalua ma ua iai foi le fanau. Sa ioe Tuimaseve Fesola’i i moliaga o lona umia ma le totōina o la’au faasaina ma lana faamatalaga i luma o le faamasinoga o tupe mai le maruana sa fesoasoani i le atina’e o lona aiga, peita’i na toe sui lana faamatalaga i lona faapea atu i le faamasinoga o le mafuaaga na ia totō ai la’au faasāina ona o le fofō lea o le gasegase o ponaivi le gugu, e aafia ai lona tua’ā tamā.

Peita’i sa lē talia lea faamatalaga a le tamā ona e leai se molimau faafoma’i sa ia tuuina atu e faamaonia ai o le maruana o le fofo lea o le gugu. Tasi lava le silasila a le faamasinoga o le autu sa toto ai maruana o le faatau e maua ai se tupe.

Ua lē faatafatafa ai le faamasinoga i lana faai’uga e talafeagai le faasalaga faafalepuipui mo Tuimaseve ma e 36 masina poo le 3 tausaga ua tuli i le to’ese.

O le feau taumolimoli lea a le faamasinoga iai latou e faia lea solitulafono ma faamaonia i luma o le faamasinoga, o lo latou i’uga o le falepuipui.