Ua mae’a se sa’ili’iliga sa faatino e sui o se auaunaga tumaoti mai fafo sa auala mai i le Komisi o Faigapalota, sa sa’ili ai ni finagalo mai nisi o faalapotopotoga tumaoti ma sui mamalu o le Palemene, i le fa’aaoga o fesootaiga televavave le online e palota mai ai o tatou tagata o alala i atunuu i fafo.
O loo tālia se lipoti ma ni fautuaga mai lea sa’ili’iliga na tuuina atu i se komiti galue a le malo mo le toe lauliliuina.
O lea ua faailoa mai e le malo se isi galuega e faatatau lava i le palota mai fafo o tagatanuu o Samoa, e ala i le faava’a poo se term of reference e galulue ai se komiti mo le iloiloina lava o le palota mai fafo o tagatanuu o Samoa.
O lea faava’a ua aofia ai le su’esu’eina o auala talafeagai e mafai ai ona auai tagata palota agavaa o loo i atunuu i fafo i faigapalota a Samoa. Va’aia o le fuafuaina, faatinoina ma e iloiloina o se poloketi faata’ita’i mo le palota mai fafo atu o Samoa.
Ma le tuuina atu o ni fautuaga mo ni teuteuga talafeagai i le tulafono o faigapalota 2019, ina ia mafai ona faatino le palota mai fafo atu o Samoa o se vaega aloa’ia o faigapalota a Samoa i soo se faigapalota i le lumana’i.
Ua faailoa i se pepa o faamatalaga mai le Ofisa Sooupu o le malo o loo faailoa ai le faava’a, o faigapalota o se vaega tāua i atunuu temokalasi ma e tatau ona auai ai tagatanuu Samoa uma.
Peitai o loo iai le toatele o tagata palota ua agavaa o loo nonofo pe malaga i fafo atu o le atunuu i taimi o faigapalota, ma ua lē mafai ai ona faatino a latou palota. Mo le silafia o aiaiga o loo iai nei o le tulafono o faigapalota o loo mafai ona palota o tatou tagatanuu o aumau ma alala i fafo, peita’i e tatau ona malaga mai i Samoa e resitala ai ma faatino ai le latou palota i aso e faia ai faiga filifiliga e sa’ili ai sui usufono o le Palemene.
