Ua amana’ia ma faatāua e le Ofisa o le Malo o Niu Sila i Samoa tausaga e tele na tautua ai le afioga, Peseta Noumea Simi, i le Matagaluega o le Va i Fafo ma Fefaataua’iga a le Malo o Samoa. O le mafua’aga lea o se faaaloalo a le ofisa o lea malo i se feiloaiga ma le Ofisa Sili o lea Matagaluega a lo tatou malo ua faamavae ma ua lamalama faai’u lona taimi galue i le tofiga.

Ua faailoa e le Komesina Maualuga o Niu Sila i Samoa le tama’ita’i o Si’alei van Toor i se faasalalauga a lona ofisa, o le a manatua pea sootaga lelei o malo e lua i le tautua a Peseta, ma o upu a le atunu’u, “Ua na o le fau e se’i ae iloga lava le mea e tu ai”; e iloa ma manatua pea lou sao lau afioga Peseta”. O upu ia na taualuga iai le faasalalauga ma le faamanuiaga ia faamanuia le Atua i fuafuaga uma i le lumanai”.

Advertisement

O le fa’atasiga a le Ofisa o le Malo o Niu Sila ma le faauluuluga o le Matagaluega o le Va i Fafo ma Fefaataua’iga o le a tu’ua le nofoa o le Ofisa Sili, sa auai e le gata o le Komesina Maualuga ae o le Sui Komesina faapea ofisa sinia ma le aufaigaluega.

O le fono ua mae’a atu nei a Ta’ita’i o Malo o le Pasefika sa usuia i le atunu’u o Palau sa momoli ai foi le faafetai a nisi o Ta’ita’i o Malo i le afioga Peseta Noumea Simi faapea le fa’auluuluga ma ofisa sinia o le Ofisa o Malo o le Pasefika o loo i Suva i Fiti.

Ua 47 tausaga o le tautua a Peseta i le malo o Samoa.