Ua faaopoopo se isi va’a i le tautua o loo faia i le va o motu o le tatou atunuu e le Fa’alapotopotoga o Va’a a Samoa, ina ua amata fealuai le va’a fou o le Fotu o Samoa III, lea e 16 miliona valuselau afe tālā. Na faatau mai e le fa’alapotopotoga o vaa lea sā fou i le kamupani o le Sealink i le atunuu o Meleisia, ma o le a mafai ona fealuai i le va o motu o le Pasefika e aofia ai ma Amerika Samoa.
Sa faatautaia mai le Fotu o Samoa III mai le atunuu o Meleisia e le ali’i kapetenei le afioga Luamanuvae Mapu Jnr Tapuaī Soti ma le auva’a sa malaga e aumai lea sā o le Fa’alapotopotoga o va’a a Samoa. E fasefulu aso na folau mai ai i le vasa ina ua tuua le atunuu o Meleisia.
E feavea’i i le vaa fou uta ma taavale ma pasese e sefulu ma le lua ua iai potu e faamautū ai. O le amataga o le vaiaso nei na faapaia ma tatala aloa’ia ai le fa’aaogaina o le Fotu o Samoa III i se sauniga sa auai le afioga i le sui o le fono a Sui Tofia le afioga i le pāpā, le afioga Le Laulu Tiatia Mapesone Mapusua, o le Palemia ma le Kapeneta faapea malo valaaulia. Ua tolu vaa o lea fausaga ua faaigoa i le Fotu o Samoa.
Comments
Loading comments…