O lea ua amata le nofoaiga a le tausala o Samoa na manumalo i le tauvaga i le po o le Aso Toonai le tama’ita’i o Poumau Astesclanalesusi Ah Lam Tiufea Va’a, sa lagolagoina e le pisinisi mai le afioaga o Sili i Savaii le Sili Eco Farm.
Ua mae’a ai ma le nofoaiga a le tama’ita’i o Iliganoa Feagaimaalii Soti Mapu sa tau’aveina le pale o le Tausala o Samoa mai le tausaga e 2025 i le 2026. O le tama’ita’i tausala mai le setete o Niu Sa Uelese i Ausetalia ua tulaga lua le first runner up o ia lea o Mille Rhonda Samuelu ma e iai lona avanoa e avea ai ma tausala o Samoa pe a le mafai e le tausala ua manumalo ona fa’aauau lana nofoa’iga i le tausala o Samoa, ma o se aiaiga masani o tauvaga tausala. O le tulaga o le second runner up ua maua e le tama’ita’i tauvā mai Hawaii.
O le tausala ua manumalo ua faaopoopo i faailoga tupe ma isi faailoga le taavale ma o le a ia umia o sana meatotino i le mae’a ai o le 12 masina o lana nofoaiga.
O le a fai o ia ma sui o Samoa i le tauvaga e sā’ili ai se Tausala o le Pasefika o le a talimalo ai Samoa i le tausaga fou 2027.
