O le po muamua o polokalame o le vaiaso o measina i lumā maota o le malo i le Eleele Fou, na molimauina le tumutumu atu iai o le atunuu e maimoa ma silasila; aemaise o ta’ita’i o le malo. O le tauvaga o siva ma’ulu’ulu, sāsā ma siva faataupati sa tausinio ai :
- Autalavou Tama’ita’i o le Mauga mai Lalovaea
- Autalavou E.F.K.S. Moata’a
- Autalavou Iesu le Ma’atulimanu mai Tula’ele
- Autalavou Katoliko Lauli’i
- Autalavou Katoliko Afega
O Pese Fa’aleaganu’u sa tauva ai le
- Mafutaga Tinā Falevao
- La’auli ma le Auāluma mai Malie lea ua sola ma le manumalo.
I le tauvaga Fa’ili Samoa [String Bands]; sa tausinio ai
- Maeva String Band mai Matāutu i Lefaga
- Coconut Band mai Siumu.
O lea tauvaga ua sola ai le Maeva String Band mai Matāutu i Lefaga ma le manumālō. O le Aso Lua lenei i Samoa ua fa’aauau ai foi polokalame se’ia oo i le afiafi nanei, o le a faia ai foi le tauvaga o siva ma’ulu’ulu, sāsāma faataupati.
O le a faia ai loa foi ma le tauvaga o siva ‘ailao afi e pei ona faailoa i le polokalame. O se tasi lea o vaega tāua i le polokalame o aso ta’itasi uma o loo faia ai le polokalame o le a’oina o le siva samoa ma le siva ‘ailao afi lea sa amata i le Aso Gafua na amatalia ai polokalame o le vaiaso o Measina a Samoa.
