Aso Lua 09 Setema, 2026.
Ua faailoa lautele ai nei e le ofisa o le komisi o faigapalota suafa o le toaselau o tagata e lei lesitala i lola palota a itumalo e agavaa ona palota ai, ma fa’ailoa ai le faasalaga e lua afe tālā e ono faasala ai.
O le to’aselau ua faailoa suafa i se faasalalauga o loo saini ai le Komesina o Faigapalota le afioga, Toleafoa Tuiafelolo Alexander Stanley, o loo faailoa ai le avanoa muamua ua tu’uina atu i ia tagata e agai atu ai loa e resitala i totonu o le 28 aso lea na amata faitau mai i le Aso Gafua o lenei vaiaso na amata ai lea faasalalauga.
O lona uiga o le tu’u avanoa o le Komesina ma le Ofisa o le Komisi o Faigapalota o le a lē mafai ai ona faasalatupe i le $2,000 tālā pe a faatino loa le resitala a o maua le avanoa.
E iai le talitonuga o le to’aselau muamua lea o tagata e lei lesitala ua faasalalau suafa e le Ofisa o le Komisi o Faigapalota. O le to’aselau lea e aofia ai ali’i e 64 ma tama’ita’i e 36.
