Ua faatumau ai nei le faai’uga a le Loia Sili a le malo e taofi le toe faia o se iloiloga poo se apili, i le faaiuga a le Faamasinoga Faaitumalo i moliaga sa tuua’ia ai le Palemia ma isi e to’alima, lea sa molia ai i le faia o tala tau faaleaga ma moliaga o le taupulepule e nātia le faia o le amiotonu.
Ua manino i le faaiuga na fofogaina i le Aso Lulu o lenei vaiaso a le afioga i le faamasino mai Niu Sila, o Justice Harrison malosi’aga faaletulafono o le Loia Sili e taofia ai le toe apiliina o se mataupu tau faamasinoga, ina ua te’ena ma faaleaoga ai le talosaga a le afioga i le sui faipule o Faleata 3, le tofa Lealailepule Rimoni Aiafi, lea sa finau ai e ala i lana loia ia faia se iloiloga faaletulafono poo se judiciary review o le faaiuga a le Loia Sili le afioga Mauga Precious Chang.
I le faaiuga a Justice Harrison o loo ia faailoa ai o le su’esu’ega a le Faamasinoga Faaitumalo ma lana faaiuga na fofogaina ia Mati o le tausaga nei, o loo manino e le’i molia ai lē ua talosaga, ae o tuua’iga i sona aafiaga i le faalavelave tau taavale na tupu ia Aperila o le tausaga e 2021 ma fano ai le soifua o Tuuau e ogaoga ae sesē ma lē sa’o.
O loo tautala foi le faaiuga o lea faamasinoga i le tauleagaina o lē ua talosaga i ni tuua’iga lē faavaea ma lē moni ma faamamāina ai lona tagata mai ia tuua’iga.
Ua le poloa’ina e le faamasinoga se totogi o le faamasinoga ina ua mae’a lana su’esu’ega i le finauga sa tuuina atu e le faipule o Faleata 3.
