I le tele o tausaga o galue ma tautua le susuga Pualele Lepou Penehuro Lefale o se saienitisi o le tau poo le climate scientist, o ia le ulua’i tama fanau a Samoa na ia maua le fa’ailoga tauāloa o le lalolagi le Nobel Peace Prize i le tausaga e 2007 ona o lona sao i lea tomai a’oa’oina fa’atasi ai ma isi tagata e to’aono sa maua lea fa’ailoga tauāloa.

O le vaiaso nei na fa’ailoa ai e lona aiga i luga o upega tafā’ilagi le maliu o le susuga ia Penehuro, o se tama fanau a Samoa ma Niu Sila sa telē lona sao i galuega tau i le si’osi’omaga ma le tau a’o galue i le fa’alapotopotoga o le si’osi’omaga o le Pasefika le SPREP, fa’apea le fa’aaogaina o lona tomai a’oa’oina i fa’alapotopotoga fa’avaomalo mo atunu’u lāiti; aemaise o ia sa ulua’i fa’avaeina le fa’alapotopotoga e ta’ua o le Lea International o se auaunaga tuma’oti e patino i galuega tau i su’esu’ega i le fa’aitiitia o fa’alavelave fa’alenatura ma feso’ota’iga o su’esu’ega fa’asaienisi o le tau.

Sa ia taulāmua foi i su’esu’ega o faiga fa’alenatura e feso’otai i tū ma aganu’u a Samoa i le mata’itūina o uiga o le tau. Sa avea foi ma faufautua mo galuega o le tau mo motu o le atu Tokelau poo se climate advisor mo ni tausaga.

O ana galuega i le tomai sa ia umia ua lauiloa ai Samoa i atunu’u ma fa’alapotopotoga fa’avaomalo sa galue ai i le tele o tausaga ma o le a manatua pea.