O le Aso Tofi o lenei vaiaso i Samoa ua feiloa’i ai le ta’ita’i o le malo le afioga i le palemia ma le ta’ita’ifono o le pulega o le lakapi i le lalolagi. O se feiloa’iga e pei ona fa’ailoa e le palemia i le fono a le palemene i le Aso Lulu o le a talanoaina ai le lumanai o le pulega o le ta’aloga i Samoa, e pei ona fa’amuta e le malo le toe lagolagoina o le Lakapi Samoa o loo faagaioia ma pulea le taaloga i lo tatou atunu’u.

O le talanoina e le fono aoao a le atunuu o teuteuga o le tulafono o loo faafoe ma pulea ai le Matagaluega o Ta’aloga ma Alaga’oa mo le Fiafia oTagata, na fa’ailoa ai e le ta’ita’i o le malo le autū o lea feiloa’iga ma tali ai foi i nisi o finagalo o sui faipule sa sausaunoa i teuteuga, aemaise o le sui faipule o Faasaleleaga 3 o loo avea ma tai’ta’ifono o le Komiti Fa’atonu o le Lakapi Samoa.

Se vaega o saunoaga a le taitai o le malo susuga Laaulialemalietoa Leuatea Polataivao Fosi ma le sui faipule o Faasaleleaga 3 le susuga Papalii Namulauulu Sami Leota i taualumaga a le palemene i le Aso Lulu. Ua tolopō ai nei galuega a le Fono Aoao Faitulafono ma toe tapena mai ai i lana tauaofiaga faai’u o lenei tausaga ua fa’atulaga mo le Aso Lua 15 o le masina o Tesema.