O le Aso Lulu o le vaiaso nei na iloilo ai e le Komiti o Aiā tatau a tagata a Malo Aufaatasi le lipoti a Samoa o loo faailoa ai tulaga ua ausia i taumafaiga e si’itia aiā tatau o fanau, tinā ma tama’ita’i faapea tagata e iai a’afiaga tumau o le soifua.

O loo fa’ailoa i lea lipoti nisi o taumafaiga a Samoa ua ausia e pei o le ulua’i tama’ita’i ua avea ma Palemia ma Sui Palemia lea foi ua avea ma ulua’i tama’ita’i ua tōfia e na te tau’ave le Minisita o Tupe, faipule tama’ita’i ua lona 2 ua avea ma Sui Fofoga Fetalai, o le si’itia o le numera o tama’ita’i ua avea ma Fa’amasino o le Fa’amasinoga ma galulue foi i le Matagaluega o Fa’amasinoga, tama’ita’i ua umia tulaga sinia i totonu o galuega ma auaunaga ‘ese’ese a le malo, faapea ma tama’ita’i ua tōfia e avea ma fa’auluuluga e lē gata i le malo a’o auaunaga tuma’oti.

I aiā tatau o fanauiti o lo’o mulimulita’ia e Samoa le feagaiga o aiā tatau a fanau i ana faiga fa’avae, ae i tagata e iai a’afiaga tumau o le soifua ua fa’atino e le malo se fa’amanuiaga tau tupe poo se penefiti mo i latou ma ē pei ona silafia o lea fa’amanuiaga tau tupe na amata i le selau tālā i le masina ae ua si’itia nei i le 300 tālā i le masina.

O se tasi o polokalame mo fanau o le penefiti o loo tapena lona amataina e maua ai e pepe ma fanau iti e oo le matutua i le 35 masina seleni e ala atu i mātua ma ē o va’aia auā le faia o puipuiga tau soifua mālōlōina e ala i le faia o tui puipui ma isi togafitiga fa’afomai ao fa’afailele lo latou tuputupu a’e.

Ae i sē tasi o matāti’a ua ausia e Samoa i ana taumafaiga lava e fa’atāua aiā tatau o tagata e iai a’afiaga tumau o le soifua, o le filifilia o se tasi o tama’ita’i e pō le va’ai e avea ma Faatonu ma pule o le fa’alapotopotoga o le Nuanua o le Alofa, ma ua filifilia foi o se sui o le Komiti a Malo Aufa’atasi mo tagata e iai a’afiaga tumau o le soifua, lea e amata lona taimi galue i lea komiti i le tausaga fou 2027.

I le lipoti lava lea a Samoa ua toe fa’ailoa ai i le iloiloga a le Komiti Fa’atonu o Aiā tatau a Malo Aufa’atasi le polokalame o le penisione mo tagata matutua i Samoa lea e maua fua ai togafitiga fa’afomai fa’apea vai ma fuala’au mo gasegase; aemaise o le feoai fua i vaa o le malo e leai se totogi.

Sa faamautū ai foi i luma o le Komiti Fa’atonu o Aia Tatau a Malo Aufa’atasi e le usugafono a Samoa le ave o le fa’amuamua a le malo i le si’itia o le fa’atāua o ia vaega uma i ana fuafuaga alualu i luma mo le atina’e manuia o ō tatou tagata.