I folasaga a nisi o atunu’u i luma o le Komiti o Aiā tatau a Tagata a Malo Aufa’atasi, na ave ai e usugafono a Niu Sila, ma Ausetalia o ni pa’aga a Samoa o lo’o fesoasoani tele i le fa’atupeina o nisi o atina’e o le tamao’aiga o le tatou atunu’u, le fautuaga ina ia ave’esea e Samoa tapu o loo a’afia ai aiā tatau o tusitala ma tagata fa’asalalau o galulue i auaunaga tuma’oti i Samoa.

E lē gata ia Niu Sila ma Ausetalia sa fa’aleoina lea fautuaga ma tu’ualalo ae sa fa’aleo foi i folasaga a isi atunu’u e valu e aofia ai Netherlands, Peretania, Siamani, Kanata, Korea i Saute, Farani, Switzerland ma Brazil.

O le vaega 13 o le tulafono fa’avae o le malo o Samoa o loo māioio ai le sa’olotoga o le fa’aaliga o manatu ma lagona o tagata i Samoa, po’o le freedom of speech and expression. O le sui o le malo o Samoa o Malo Aufa’atasi na fofogaina le tali a lo tatou malo i fautuaga ma tu’ualalo na fa’aleo e atunu’u e sefulu i le iloiloga a le Komiti Fa’atonu o Aiā Tatau a Malo Aufa’atasi i lana fonotaga i Sineva i le vaiaso nei.

I lea tali sa fa’ailoa ai le amanaia e Samoa o aiā tatau ma le sa’olotoga e pei ona aiaia i le fa’avae o le tatou atunu’u.

Le faletua o Nella Pepe Tavita Levy o le Amapasa o Samoa i Malo Aufaatasi i se vaega o lana folasaga na fa’asalalau i feso’otaiga a Malo Aufa’atasi i luga o upega tafā’ilagi. O le tama’ita’i Amapasa sa ia fofogaina foi le saunoaga mai le ta’ita’i o le malo le afioga i le Palemia na amata ai iloiloga o le lipoti a Samoa i lea tauaofiaga a le Komiti Fa’atonu o Aiā tatau a Malo Aufa’atasi.

O le usugafono a Samoa sa aofia ai ofisa sinia o le Matagaluega o Aiga ma Agafesoota’i, le Matagaluega o Fa’amasinoga ma le Fa’afoeina o Mataupu tau le Fa’amasinoga, Matagaluega o le Vā i Fafo ma Fefa’ataua’iga, ma le Ofisa o le Komisi mo le Toefuataina o Tulafono a Samoa.