Ua ufitia i le ao pogisa le Itumalo fa’aalalafaga o Sagaga le Falefa lea ua suia nei lona igoa o le itumalo palota o Sagaga 4, ona o le tu’ua o le malo e se tasi o tamali’i sa tau’aveina le nofoa o lea itumalo i le Palemene, mai le tausaga e 1988 i le tausaga e 1991.

O le afioga Sapa’u Lilomaiava Lolesio Vitale e tasi le paea’iga faapalemene sa ia tautuaina ai lona itumalo i upufai o le malo ma ia lagolagoina ai le Vaega Faaupufai o le S.N.D.P a o ta’ita’i le afioga i le Tama’aiga le afioga, Tui Atua Tupua Tamasese Efi.

Advertisement

O se tamali’i o le a manatua foi lana tautua i le malo i le galuega sa galue ai o se malu o le malo poo le leoleo, lea e tele tausaga o lona soifua sa tautua ai i lea Matagaluega ma mālōlō litaea ai i le tausaga e 1987. Na soso’o ma le tausaga e 1988 na manumalo ai i le palota tele o lena tausaga ma avea ai ma faipule o le Palemene.

E tu’umālo le afioga Sapa’u Lolesio Lilomaiava Vitale ua 99 tausaga o lona soifua, ma o le tausaga e 2023 na faaee atu ai ia te ia e le malo le faailoga tauāloa o le Officer of the Order of Samoa e amana’ia ai lana tautua i le malo ma le atunu’u.

O le Aso Lulu o le vaiaso nei e pei ona fa’ailoa e lona aiga i luga o upega tafāilagi o le a faia ai ona toe sauniga ma lagomau ai i lona aiga i Le Fu’afu’a i Alamutu Saleimoa.