O le amataga o lenei vaiaso i Samoa ua fagasolo ai ni mafutaga faalea’oa’oga i le tomai faasalalau ma le lipotia o mea e tutupu mo tagata o galulue i lea tomai i Samoa, e faatautaia e se tama’ita’i na manumalo i le faailoga o le Emi-Award i galuega faasalalau i totonu o Utah i Amerika.

O Tamara Vaifanua na soifua a’e i Amerika ao ona tua’ā o ni Samoa ma o le mu i Maui i le setete o Hawaii sa ia pu’eina ai ma tu’u faatasia se polokalame tau televise na maua ai ona faailoga e lua i le Emi award, ae sa galue foi i le lipotiina o ta’aloga a le Olimipeka na faia i Farani i le tausaga e 2024.

Advertisement

Ua faailoa e le Ofisa o le Malo o Amerika i Apia o loo aumaia lea tama’ita’i faasalalau mo le faatinoina o ia a’oa’oga. O Tamara o loo galue nei o se tagata e faitauina tala o mea e tutupu i le fale televise o le KSL i totonu o Utah o se auaunaga e galulue faatasi ma le auaunaga televise lauiloa i le lalolagi o le FOX TV.

Ua faailoa foi e le Ofisa o le Malo o Amerika i Samoa ua malaga atu i le atunuu lea tama’ita’i faasalalau ma tusitala i le polokalame ua ta’ua o le speaker e autū i le faamalosia o le saolotoga e faatino ai lea galuega, ma fesoasoani ai foi e siitia lea tomai mo ē o galulue ai i Samoa.

O fanau o loo a’ooa’oina lea tomai i le Iunivesite Aoao o Samoa o le a afea foi e Tamara Vaifanua mo se mafutaga faalea’oa’oga.