Ua tau lalata mai le aso pa’epa’e o le fanau lea e pa’ū tonu i le Aso Sā lona lua o le masina fou o Oketopa, ma ua fetaui lelei ma le fa’ailoa e le Kamupani Va’alele o le Samoa Airways o le toe faia o malaga a ona va’alele lāiti e afea ai le malae va’alele i Maota i Savai’i.

O le aso 8 o le masina fou o Oketopa o le a toe amatalia ai malaga a le Samoa Airways e afea ai Maota ma le fuafuaga a le kamupani va’alele ua talafeagai le taimi ma tapenaga o le Aso Sā o Tamaiti, ia i latou e fia malaga i le va o motu e fai mālologa ma molimauina le Aso Sā pa’epa’e o le fanau.

Advertisement

O le malae va’alele i Fagali’i o le a fa’atautaia mai ai malaga i le motu o Upolu ma aga’i atu ai i Maota i Savai’i.

Ua fautuaina ai e le Samoa Airways le atunu’u faimalaga e tatau ona iai sou ata e avea ma faamaoniga poo se ID i le totogiina o pasese.

Ua toe amata malaga i le va o motu e lua e afea ai malae va’alele o Fagali’i ma Maota i le pasese faapitoa e lua selau tala i le malaga e tasi lona uiga e 400 tala le alu ma le alu ma le toe foi.

E le o mautinoa i tapenaga a le kamupani va’alele poo afea e toe lele ai i Asau i Savai’i ona va’alele.