O le Aso Lulu o lenei vaiaso ua tatala ma amata ai le fono e ta’i lua tausaga ma usuia a le Faalapotopotoga o auaunaga Faasalalau ma Tusitala o le Pasefika lea e ta’ua o le PINA poo le Pacific Island News Association, ma o loo auai le usugafono a le Asosi o Tusitala ma le Au Fa’asalalau a Samoa le J.A.W.S.

O se fonotaga o le a toe ulufale ai le Asosi o Tusitala a Samoa i lea faalapotopotoga tele o galuega faasalalau a atunu’u o le Pasefika, i le silia ma le sefulu tausaga e le o toe avea ma sui resitala o le P.I.N.A, o se faalapotopotoga na uluai faavaeina ma resitala i Samoa.

Advertisement

Fa’aalia e le Peresitene o le JAWS o Taliilagi Keresoma, o se taimi muamua lea ua toatele ai se usugafono a le asosi i le fonotaga ma e faafetaia ai le agalelei o le polokalame mo le atina’e o galuega faatusitala ma faasalalau a le Malo o Ausetalia i le pasefika le PACMAS i le faatupeina o le malaga atu i Fiti o le usugafono a Samoa lea e to’aiva i latou o sui o le JAWS o loo auai.

O le amataga o le vaiaso na amatalia ai nisi o a’oa’oga mo sui o usufono o loo auai, ae o le Aso Lulu lenei ua tatala aloa’ia ai e le Ta’ita’i o le Malo o Fiti le afioga i le Palemia, le afioga Tagaloa Sitiveni Rambuka. E pei ona silafia o le Fono a Malo o le Taupulega i Samoa i le tausaga e 2024, na auai le palemia o le malo o Fiti, na faae’e ai lona suafa Tagaloaalagi o se fa’aaloalo maualuga a le afioaga o Leauva’a.

O le usugafono a Samoa ua aofia ai le sui mai auaunaga faasalalau o le televise ma le leitio a le Ekalesia Katoliko i lo tatou atunu’u le UpuManaTV, sui o le Samoa Global, sui o le Talamua, sui o le NUSTV i le vaega o Tala Fou, sui tusitala tuto’atasi e galue mai Samoa mo le televise a Ausetalia o le ABCTV, ma sui o le Komiti Faafoe o le Asosi o Tusitala ma Tagata Faasalalau a Samoa.

O le Aso Faraile e faai’uina ai le fonotaga ma toe taliu ai i fanua le usugafono e silia i le 15 mai atunu’u ‘ese’ese o le Pasefika e aofia ai Ausetalia ma Niu Sila.