A’o lumanai ai le aso Faraile o le vaiaso nei e toe felelei ai i le malae va’alele i Maota i Savai’i va’alele laiti Twinotter o le Samoa Airways, ua fa’ailoa e le kamupani va’alele i le Aso Lua ni suiga i ana tapenaga. O malaga e tolu i le vaiaso ua suia nei i le faia o malaga faatulagaina i aso uma o le vaiaso e amata i le Aso Faraile nei.

O le pasese sa fuafua e amata ai e 200 tālā i le alu ma 200 tālā le toe foi, ua suia i le 120 tālā i le malaga e tasi po o le one-way ticket, lona uiga ua fa’aitiitia mai le 400 tālā i le malaga e lua sa fuafua muamua ai e le Samoa Airways, i le 240 tālā i le alu ma le toe foi.

O se faaiti’itiga i le pasese e 80 tālā i le malaga e tasi lona uiga ua aveesea le 160 tālā. Sa na o le tolu malaga i le vaiaso sa fuafuaina muamua ao lea ua faia i aso uma o le vaiaso mai le aso Gafua i le aso To’ona’i i le va o Fagali’i ma Maota.

Ua molimauina i le tapenaina o le malae va’alele i Maota nisi o galuega o loo fa’atino ai e le Pulega o Malae Va’alele a’o le’i toe tatala malaga i le va o le malae va’alele i Fagali’i aga’i i Maota.

Ua fuafua tonu le toe tatala o malaga a le kamupani va’alele i le va o motu o Upolu ma Savaii ma le sauni ai o le atunuu e fai lotu tamaiti i aiga i Puleono ma Tumua. Ua fautuaina e le kamupani va’alele o le Samoa Airways le atunu’u faimalaga i Savai’i e fesoota’i le ofisa malaga o le Kuki Travels i le malae va’alele i maota mo le faia o avanoa ma totogi iai pasese, ae o le malae va’alele i Fagali’i ma le ofisa autū i le maota o le Ekalesia Metotisi i Matafele i Apia mo tagata malaga i Upolu.

O loo maua foi le avanoa i le upega tafāilagi poo le website a le Samoa Airways e faia ai fesoota’iga faatekonolosi mo ni avanoa ma le totogiina o pasese.

O malaga i le Aso Sa mo Savai’i o le a fa’atino mai le malae va’alele i Faleolo.