I le tuana’i o nai aso na fa’alauiloa ai e le Ofisa o Numera Fa’amaumauina lana ripoti o fa’amaumauga o tupe fa’aalu a le malo i le atina’e o le tamao’aiga lea na fa’ailoa ai le palasi maualalo i le 8 tesimale 1 pasene o le GDP poo le tu’uaofa’iga atoa o tupe maua ma tupe alu i galuega ma auaunaga i se aofa’iga e silia i le 2 selau miliona tālā, ua toe fa’asolomuli i tua lea lipoti e le ofisa o numera fa’amaumauina mai lana upega tafāilagi.

O le mafua’aga e pei ona fa’ailoa e lea ofisa o le malo, ua toe autalu ma fefulisa’i le ripoti. O le pa’ū maualalo o le GDP e mafua i le faaitiitia o galuega tetele faatino a le malo e maua ai galuega mo tagata faapea isi ana auaunaga e faataamilo ai tupe fa’aalu i le fuafuaga e toe faaopoopoina ai tupe maua.

O le ofisa o numela faamaumauina a le malo e telē lona tāua, auā na te aoina mai fa’amatalaga i tupe maua mai atina’e ‘ese’ese e pei o galuega tetele, oloa fa’atau i fafo ma oloa e fa’aulufale i le atunu’u, faapea tupe maua le atina’e o tagata tafafao lea e maua ai foi numera o tagata malaga tafafao mai poo turisi, faapea i latou e asiasi mai ona o fa’alavelave ma isi fuafuaga faale’aiga. E lē o manino mai pe toe fa’ailoa lautele le ripoti ua faasolomuli.