E fa’agalo gatā i le mafutaga o le galuega i le tomai faafoma’i i Samoa le tautua ua afu a sē tasi o tama’ita’i ma tinā o le atunu’u ua tele tausaga o lana auaunaga i le malo ma Samoa i lea tomai a’oa’oina, le tōfā Namulau’ulu Dr Nuualofa Tu’uau Potoi, na faamanavaina e le Atua ana galuega i le Aso Faraile ua mavae i le 78 o tausaga o lona soifua.

O Namulauulu Dr Nuualofa Potoi e pei ona silafia ai o se auauna i le galuega faafoma’i sa tele lona sao i le auaunaga fa’asoifua mālōlōina, ose ta’ita’i i le galuega e pei na sa se’ei i le tofi Peresetene mo ni tausaga i le Asosi o ali’i ma tama’ita’i foma’i, le Samoa Medical Association.

E lē gata sa tele tausaga o lana auaunaga fa’afoma’i ae sa lotolotoi foi i nisi o faalapotopotoga tuma’oti i le atunu’u. Ua fa’ailoa mai e se tasi o lona aiga o le Aso Tofi o le vaiaso nei e faia ai ona toe sauniga ma lagomau ai i lona maota i Tiapapata.