I le na’o le lua o va’alele lāiti twinotter o loo faia le tautua a le Samoa Airways i le taimi nei, a’o folau atu i Kanata le va’a o loo ave ai ini pusa’oloa ta’i 40 futu vaega ma totoga o le isi ona va’alele laitiiti mo le toe fa’aleleia, ua fa’ailoa e le Ofisa Sili o le Pulega o le Kamupani va’alele o loo tau fa’asoa nei va’alele e lua mo ana malaga, e lē gata i le va o Upolu ma Savai’i, ae o malaga i Amerika Samoa lea e afea ai le motu o Tutuila ma malaga i le Manu’atele.

O le mafua’aga lea o le taofia o le isi malaga e tasi i le va o Fagali’i ma Tafuna i Amerika Samoa i Aso Gafua ae o loo tumau malaga o isi aso o le vaiaso i le va o Samoa e lua.

O le finagalo o le Ofisa Sili o le Samoa Airways le afioga Fauo’o Fatu Tielu i se fa’atalanoaga i lona ofisa, lea sa fesiligia ai foi i le sa’o tonu o le malaga togipau na aumai ai se gasegase mai maota i Savai’i i le aso muamua na toe tatala ai malaga i le va o Upolu ma Savaii. Fa’aalia e le Ofisa Sili o lana fa’atonuga na taofia ai le alu o le va’alele ona e nao le toatasi le pasese, ae na fa’atoa iloa mulimuli ane ina ua logo atu e se tasi o le komiti fa’afoe o se gasegase e fia aumai i Apia.

O le saunoaga a Fauoo i le fa’atalanoaga o le gasegase lava ia na fia malaga mai i Apia i malaga fa’atulagaina poo scheduled flights, ae ina ua le alu le va’alele ona e leai ni pasese, na mafua ai ona iai se fa’agaulēmalie o le gasegase ma lana au malaga e toalua.

Na alu le va’alele ma aumai ai le pasese e toatolu e aofia ai le gasegase lea na fa’aalia e le Ofisa Sili sa totogi oo latou lava pasese ae e lei togipauina e tusa o tulaga masani e fa’atino mo se gasegase e fia aumai fa’anatinati i le maota gasegase i Motootua.

O le totogi e alu ai le va’alele e lima afe tala mai Maota i Fagali’i ma e totogi e le auaunaga a le Matagaluega o le soifua mālōlōina.