O loo tū malosi le faigamalo a Samoa e lagolago le Pacific Justice ma lana mau o loo momoli e le afioga Anae Arthur Anae ma ē o latou galulue faatasi, i le tatau i le malo o Niu Sila ona faia ni suiga i le polokalame nofomau mo tagata Samoa ma le Pasefika. O le tu’utu’u la’au mai i lo tatou atunu’u o le au malaga a le Pacific Justice ma faia ai se fa’aafe i le afiafi o le Aso Gafua, na saunoa ai le ta’ita’i o le malo ma ia fa’ailoa le tāua o le lalago a le malo fa’apea ma lo tatou atunu’u ona ua 64 tausaga o le feagaiga fa’auō a Samoa ma Niu Sila ae o loo pologa pea o tatou tagata i le atunu’u i le faigata o aiaiga o le nofomau fa’apea ma visa o loo malaga atu ai i Aotearoa e o si aiga i faalavelave aemaise o isi fuafuaga taua faale’aiga, o pisinisi ma galuega.

Le afioga i le palemia susuga, Laaulialemalietoa Leuatea Polataivao Fosi. O le Aso Lua o lenei vaiaso sa feiloa’i ai le afioga Anae Arthur Anae ma lana au malaga i le mamalu o le atunuu i Savai’i lea sa faia le feiloa’iga i le maketi Salelologa.

O loo mafai ona maua i upega tafāilagi a le Pacific Justice feso’otaiga e sainia ai suafa o le tatou atunu’u e fa’ailoa ai lo latou lagolagoina o le mau e momoli i le malo o Niu Sila mo le faia o suiga i le polokalame o le nofomau i Aotearoa.