O le toe ave’esea ma le upega tafāilagi a le Ofisa o Fuainumera Faamaumauina a le malo o lana lipoti o le tamao’aiga i le itu i tupe maua, ae ua lata i le vaiaso talu ona fa’alauiloa ai lea ripoti, ua aumai i se tulaga fa’alauaitele se fa’amatalaga mai lea ofisa o le malo ua fa’amalamalama ai le mafua’aga o le f’a’asolomuli ma lana upega tafāilagi o le lipoti.

“ Na faia lea tulaga ina ia ‘alofia ai le ono sesē o le fa’auigaina o fa’amaumauga, ona o ni ‘ese’esega i fuainumera mai le fa’ailoilo aloāia mo le fuaina o le tamāo’āiga, i le Vaega o Gaosiga [G.D.P.-Production] ma le ripoti o Tupe Fa’aalu po’o le G.D.P.-Expenditure.

Mo le silafia e le mamalu o le atunu’u, e pei ona fa’ailoa i le fa’asalalauga, o le Fua Fa’atatau o le Tamāo’āiga [G.D.P. Production] o le fa’ailoilo aloā’ia lea a Samoa mo le mata’itūina o le tamāo’āiga i ona vaega ‘ese’ese i kuata ta’itasi, ma o lo’o mulimulita’i lava i Faiga fa’avāomālō [International Standards] talu lona fa’avaeina. E tumau pea le avea o le lipoti o le G.D.P.-Production ma fa’ailoilo aloā’ia mo le tamāo’āiga o Samoa”

O le G.D.P.-Expenditure o se fa’ailoilo fa’aopoopo i le fa’ailoilo aloā’ia ma o lo’o fa’aauau pea lona atia’eina ma o lo’o i se tulaga o numera fa’ata’ita’i [experimental]. O lo’o fa’agasolo pea galuega a le Ofisa mo le toe iloiloina ma le fa’aleleia atili o fa’amaumauga uma o lo’o tu’ufa’atasia ai lenei fa’ailoilo, ina ia mautinoa e tu’uina atu i le atunu’u fa’amaumauga maumaututū, atoatoa ma talafeagai.

O le toe iloiloina o nei fa’ailoilo, o la’asaga masani fa’a-fuainumera ina ia atoatoa ma maumaututū fa’amaumauga, ma e le’o se tulaga e ono fa’apopoleina ai le lautele. O lea tulaga e atagia ai le fa’amamafa a le Ofisa i le tu’ufa’atasia o fa’amaumauga i ta’iala manino ma le atoatoa fa’apea ma le fa’atuatuaina.

E fa’aauau pea le galulue fa’atasi ai o le Ofisa o Fuainumera Fa’amauina ma Pa’aga mai fafo i le fa’amalosia ma le fa’aleleia o tulaga i le tu’ufa’atasia o fa’amaumauga tau Tupe o le Tamāo’āiga [National Accounts], ina ia lelei atoatoa, maumaututū ma fa’atuatuaina mo le fausia o ta’iala ma faiga fa’avae a le atunu’u.