A’o tapena ai nei le Ofisa o Numera Faamaumauina a le malo mo le aoina o faamatalaga i le aofa’iga o tagata, ma fale i lo tatou atunu’u i le isi o tusigaigoa tele a Samoa i le masina nei, ua valo’ia le ono si’itia o le faitau aofa’i o le atunu’u i le silia i le luaselau luasefulu afe (220,916) pe a fua i le faitauaofa’i o tagata o nonofo ma faamautū i Samoa i le tusigaigoa mulimuli na faia i le tausaga e 2021 lea o loo faamauina e 205,557.

Ua fa’ailoa e le Ofisa o Numera Faamaumauina le mae’a o le vaiaso muamua o a’oa’oga sa faia mo ta’ita’i poo supervisors mo le tusigaigoa aoao a le atunu’u, faapea ma le vaiaso muamua o a’oa’oga mo i latou o le a galule i le aoina o faamatalaga.

O le vaiaso mulimuli lenei o ia a’oa’oga mo le au galulue, i latou o le a āfea laoa ma maota o aiga i le atunu’u atoa. O le latou galuega e le gata o le a maua ai le aofa’iga o tagata ae o le a iloa ai foi le tulaga o iai le numera o ali’i ma tama’ita’i.

O le tusigaigoa o le tausaga e 2021 sa faamauina le aofaiga o alii e 104,853; ae o tama’ita’i e 100,704.

E amata le tusigaigoa i le Aso Lua o le vaiaso fou le aso 13 o Oketopa pe a mae’a le Aso Gafua le aso mālōlō o le lotu a tamaiti.

E ta’i lima tausaga ma faia tusigaigoa mo le atunu’u atoa.