Ua amata tuli le fa’asalaga faafalepuipui e 4 tausaga ma le 6 masina o Ilaita poo Ilai Tafili o Vaitele fou ua 54 tausaga o lona matua, ina ua fa’amaonia ona moliaga e 4 e aofia ai le umia o le 42.06 kalama o le pauta faasāina o le ‘aisa, umia o ni meafaitino o ni paipa tioata se lua, o se fua poo se scale, ma se straw e faaaoga e mimiti ai e le isu sei tulou le ‘aisa.

Sa ia umia foi faasolitulafono se la’au malosi ma ni ututau. O se osofaiga a leoleo na su’e ai le fale o Ilaita poo Ilai i a Tesema o le tausaga na tea nei, na maua ai le aisa, paipa ma isi meafaitino, le la’au malosi ma ututau i lona fale i Vaitele fou.

O se osofa’iga na faia i le taeao po ua te’a le fitu lea sa iai lē ua molia ma lona to’alua i le taimi o lea galuega a leoleo. E iai foi se isi moliaga tau solitulafono sa molia ai Ilaita i le tausaga e 2022 ae o fuala’au faasāina foi na tuua’ia ai ma le umia o se paipa.

Sa tete’e le ua molia i moliaga uma e fā a leoleo ae na suia lana tali i le ioe i le aso na faatulaga e vala’au ai molimau e lagolago ai ona moliaga.

O lona fa’asalaga e 4 tausaga ma masina e 6, ua tuli ua tō’esea ai aso sa nofo taofia ai a’o su’esu’eina ona moliaga e leoleo.