A’o lei tu’ua Samoa e se vaega o le ‘au pu’eata tifaga sa pu’eina le ata o le Sweet Lips, o le lagolagoina e le ali’i Fa’atonu o le ata tifaga le afioga Tauti Tusi Tamasese ma lana pulega i le galuega fesoasoani o loo faia e le To’omaga mo ē puapuagatia, na latou foa’i ai se seleni e lua afe lima selau tālā mo ana auaunaga.

I se pepa o fa’amatalaga ua fa’ailoa ai e le To’omaga o le taua o lea lagolago ona o lana galuega o loo amanaia ai aiā tatau o tupulaga talavou, o se tasi o manulautī o le tala sa pu’eina i Samoa lea e fa’atāua ai le sao o tupulaga.

Ua fa’afetaia ai e le fa’alapotopotoga le agalelei o le pulega ma le ‘au faigaluega o le ata tifaga lea o le a tatou tulimata’i le aso e mae’a ai ma salalau mai mo le maimoaina e le atunuu ma le lalolagi.