O taualumaga a le Fa’amasinoga Fa’aitumalo i Mulinu’u i le Aso Lulu o lenei vaiaso na toe vala’au ai moliaga o lo’o tuua’ia ai le ta’ita’i o le itu agai le susuga Tuilaepa Lupesoliai Sailele Malielegaoi, ma ua fa’amautu ai le su’esu’eina o molimau i le amataga o le masina o Mati o le tausaga fou 2027.

O le tagi a le palemia faasaga i le ta’ita’i o le itu agai i le fa’aso’esa ma le faia o fa’amatalaga sesē ma tau fa’aleaga ua tē’ena ai e Tuilaepa moliaga uma e pei ona sa tu’uina atu lea tali tete’e e lana loia ao fa’agasolo taualumaga a le fa’amasinoga.

O loo iai foi le tagi a Tuilaepa o loo fa’asaga i le palemia susuga, Laaulialemalietoa Leuatea Polataivao Fosi ma o le a su’esu’e faatasi ia tagi i le aso muamua o Mati o le tausaga fou lava.

I le tagi a le Minisita o Aoga ma Aganu’u fa’asaga foi le ta’ita’i o le itu agai o lo’o talosaga le loia a Tuilaepa e su’esu’eina faatasi ma isi tagi i le masina lava lea, ma ua fa’atalia ai e le fa’amasinoga le talosaga tusitusia a le loia o loo tulai mo le ta’ita’i o le itu agai ina ia iloilo ai e le fa’amasinoga se faaiuga pe talia.

O moliaga i le tagi a le Minisita o Aoga ma Aganu’u o loo tuua’ia ai le Ta’ita’i o le Vaega e Puipuia Aia Tatau a Tagata i le tau fa’aleaga e mafua ini saunoaga a Tuilaepa i luga o upega tafā’ilagi sa ia tuua’ia ai le minisita le afioga, Aiono Alec Ekeroma i lona ave o meafaigaluega a le falemai i Moto’otua ua fa’aaoga i galuega i lona falema’i tumaoti, ao avea Aiono ma Ofisa Sili o le Pulega o le Matagaluega o le Soifua Mālōlōina.