O se tasi o mataupu tau fa’amasinoga o loo a’afia ai le ta’ita’i o le malo le afioga i le palemia, ua lipotia ai e le vaega fa’asalalau o le MerMada Pacific, ua fa’ailoa ai o le tagi e ala i le sū e tasi le miliona selau afe tālā ua fa’aulu e lē sa avea ma ulua’i tama’ita’i palemia o le atunu’u le afioga Fiame Naomi Mata’afa lea o loo molia ai le ta’ita’i o le malo le afioga i le palemia susuga, Laaulialemalietoa Leuatea Polataivao Fosi ile tau fa’aleaga i le Fa’amasinoga Maualuga.

E pei ona lipotia e lea auaunaga fa’asalalau sa faia se soālaupulega i le va o itu auai, pe maua ai se autasiga e teuteu ma fofō ai le mataupu e aunoa ma le fa’aauauina o le sū, peita’i ua fa’aauau le tagi ma o le masina o Mati o le tausaga fou e su’esu’e ai finauga a le itu tagi ma le itu o lo’o molia.

O loo sū e le afioga Fiame Naomi Mata’afa le Palemia i sana saunoaga i se tasi o fa’alauiloa a le vaega fa’aupufai o le Faatuatua i le Atua Samoa ua Tasi na faia i Savai’i i le taimi o fa’atōsina o le palota tele ia Aukuso o le tausaga ua mavae.

O lea saunoaga na fa’ailoa ai le a’afia o lē sa avea ma Palemia i se gaioiga e feso’ota’i i le maliu fasia o le tina o Caroline Sinavaiaana Gabbard o Amerika Samoa.

I se tasi o mataupu tau fa’amasinoga o loo a’afia ai le ta’ita’i o le malo ma o Fepuari o le tausaga fou e valaau ai molimau, o le tagi lea a ni alii leoleo sinia o loo molia ai le Palemia i le faia o ni saunoaga i se polokalame i upega tafā’ilagi na tuua’ia ai ia ali’i leoleo i lo la talia o ni tupe i se faiga fa’aālatua e taofia ai le su’esu’ega o le maliu o le ali’i talavou na fano le soifua i se fa’alavelave tau ta’avale i Vaitele Uta ia Aperila o le tausaga e 2021.