Ua muta le taumafai o le ‘au lakapi liki a lo tatou atunu’u le Toa Samoa ma le Fetu Samoa, fa’apea isi ‘au mai le Pasefika. Ua lē sao i le sā’iliga o le siamupini o le Ipu o le Lalolagi, ae ose tala fiafia mo Samoa ma le atunu’u tuaoi o Tonga le silasila ai nei o le Pulega o le Lakapi Liki e si’itia atu le Toa Samoa ma le Mate Ma’a Tonga i ‘au i le vaega o ali’i i le vaega muamua po’o le Tier 1.
Ua fa’ailoa lea la’asaga maualuga o le a si’itia iai Samoa ma Tonga ma le fa’ailoa foi e le pulega o lea lakapi o suiga o le a iai le tulaga agava’a o tama ma teine ta’aalo i le lakapi liki i le isi ipu o le lalolagi i le tausaga e 2030. O le a agava’a tagata lakapi liki e fia ta’aalo mo latou atunu’u i so’otaga fa’ale’aiga i matua ma matua o matua poo grandparents.
Ua faia lea suiga e pei ona fa’ailoa i se pepa o fa’amatalaga ona o le talosaga mai le atunu’u o le Atu Kuki e talatala teisi i tua le tulaga agava’a ona e toaitiiti le faitauaofai o tagata o le Atu Kuki o loo nonofo i le atunu’u ae toatele ua nonofo i isi atunu’u.
Ua faamautū mai foi e le Pulega o le taaloga Lakapi Liki le talimalo o Amerika i setete o Utah ma Hawaii le Ipu o le lalolagi i le tausaga 2030 mo ta’aloga i le vaega o ali’i ma tama’ita’i ae o le lakapi liki mo tagata e fa’aaoga wheelchairs poo nofoa fa’atavalevale o le a faia i le atunuu o Farani.
O le a si’itia le numela o atunuu e auai i le isi ipu o le lalolagi lea o le a si’itia atunu’u ile 12 mo le vaega o ali’i ae o tamaitai o le a sefulu atunuu e auai.
Comments
Loading comments…